PRESBYTERIAN KOHHRAN KALPHUNG

PRESBYTERIAN KOHHRAN KALPHUNG

Rev. R. Lalhmingthanga

i/c Tanhril Pastor Bial

THUHMA: Kan Presbytery huam chhungah hian Presbyterian Kohhran kalphung thupui zir tura kan thlan ziaktu atana tling zawk kan tam awm tehlul nen, kei kher min ruat hi hrehawm ka tiin insit  a na duh hle mai. Committee hmaah kan tang zolo a, kan nih awm ve ta chu a ni mai a. A phuailuai ang tih ka ring a, mahse kan inti mualpho lo a niang chu. Minister te ngei ruat tur a nih pawhin kei aia ruat awm zawk Synod Moderator lo ni tawh chin pawh kan thahnem a, Pastor thawk laiah pawh kan Presbytery huam chhungah pawh ka la nau em nen, bakah thu ziak ve ngailo ka nihna pawh a paper atang mai pawhin kan hre zel dawn a ni. Ka thiam anga ka han buatsaih chu tiang hian han zir ta ila.

                        Kohhran hrang hrangte hi an hming a inan avangin an kalphung leh Thurin a inang dikdiak vek lo. Penticostal Kohhran te, Baptist Kohhran te pawh hmun danga an anpuite nen an kalphung leh tih danah te nasa takin an in ang lo a ni. Chutiang bawkin Presbyterian Kohhran te pawh hi mahni awmna ram milin kan kal tho. Ze ingang leh tihdan phung inang lai tamtak awm mahse kan hranna lai pawh sawi tur a tam viau tho a ni. PC-USA leh keini Kohhran te pawh inang lo tak kan ni a. Chu chu sawi loh, PCI (Presbyterian Church of India) huam chhung Presbyterian Kohhran te pawh kan kalphung a hrang nual a ni. Danpui leh Thurin puanchhuah thuhmun kan ni a. A bak hi chuan mahni ram leh ze mil thoin kan kal mai a ni. Mizoram Presbyterian Kohhranah pawh hian tualchhung Kohhran te thlengin kan in-an vek lohna lai a tam em em a ni. Khirh leh duhtui, inthlah zal kan intihna pawh a inang lo khawp ang. Chutiang teh nuai karah chuan Mizoram Synod hnuaia Presbyterian kalphung hi kan zir dawn anih chu!

                        Kalphung tih hian a huamzau thei hle dawn a. Chuvangin he paper-ah hian kan Kohhran tobul chhui ila. Tin, rorel dan leh inawp dan kalphung te, Pathian biakdan kalphung te, Pathian thu kalpui dan tlangpui leh a khawhawi tlangpui te zir kan tum dawn a ni. Kan kalphung hi kan hraitchian a ngai a, a thatna leh that lohna hre chungin siamthat a ngaihna lai apiangah kan siamthat pawh a tul mai thei a ni.

I. PRESBTERIAN KOHHRAN TOBUL : Kum 1904 khan India rama Presbyterian Kohhran Mission hrang hrang awmte chu inzawm khawmin India ram Presbyterian Kohhran (Presbyterian Church of India) an lo din tawh a. An inkhawmpui hmasa ber pawh Jumna Presbyterian Church, Allahabad ah 19^th.December.1904 khan an nei a ni. Nimahsela hun lokal zelah heng Presbyterian Church of India te hi Church of South India (CSI) leh Church of North India (CNI) ah te an lo insiam leh ta a ni.

                        Tuna Presbyterian Church of India (PCI) kan tih tak lo din tanna chu Welsh Missionary Rev. Thomas Jones-a Kum 1841-a Khasi ram Cherapunji a lo thlen atang khan a chhui theih awm e. Chuvangin Presbyterian Church on India lo pian chhuah dan chhui tur chuan a hringtu Welsh Calvinistic Methodist Church atang hian chhui tan kan tum dawn a ni.

(i)     The welsh calvinistic methodist church chanchin : Kum Zabi 16 & 17-na laiin England ram hmun hrang hrangah Protestant Kohhran a darh a, nimahsela, Kum zabi 18-na tir lam a lo thlen chuan Kohhran pawh a lo dul leh tawhin an lo chau leh viau hman tawh a, chutiang karah chuan rawngbawl tura inbuatsaih lai Morgan-a leh John Wesley-a te chuan an thian zirlai tlemte te nen Pathian pawla tawngtai hona te an nei thin a. Thahnem ngai taka Pathian pawla an tawngtai thin avang chuan kum 1729, November thla chuan an zingah Pathian Thlarau thianghlima harhna a lo thleng ta a. An nun te chu inthlak danglamin tanin leh hmun tawphnawk lai te tlawh chhuah tul tihna a siam a. Chutianga thahnem ngaia an inpekna leh rawngbawlna chuan mite ah rah duhawm tak a chhuah ta zel a. Kum 1735 khan George Whitefield-a kum 18 mi chauh chuan a rawn zawm ve a. George Whitefield-a hruaina hnuaiah he harhna hian Wales ram a thleng a. Nasa takin Wales ram chu a sawi nghing a ni. Nun uluk leh kalphung fel tak neih an uar em avangin Methodist (mi invawng fel ho emaw mi fekfawn ho) tiin an ko el thin.

            Sawi tawh angin he harhna hian Wales ram a nuai nasa hle a, harhna hruaitu ropui tak tak Howell Harris-a te, Daniel Rowlands –a te, Griffith Jones-a te leh William Williama-a te ho an lo chhuak a, an tum ber chu Kohhran muthlu tawh kaihharh ani. Wales ram dung leh vang chhak leh thlangah zin kualin Isua Krista Chanchin Tha sawiin mite chu nundan tha-a awm turin an fuih nasa thin. Harhna changtu te chuan pawl an din a, chu chu Society an ti. Kohhran thar din an tum lova, an Member te pawhin Church of England ah Sakramen an dawng thin. Kawng  tinrengah Kohhran pawi sawi an hlau em em ani.

            Amaherawh chu, Kohhran aiin an pawl bik an ngaipawimawh ta fo a. Tin an pawlah chuan piangthar te chauh tel an phal avangte pawh a niang Church of England Kohhran chuan a ngaimawhin an chungah a thikthu a tichhe ta tial tial a. A tiduhdah ta hial a ni. Thenkhat te phei chu Lunginah te an tantir a. Hetiang boruak hnuaiah hian harhna changtu te chu an lo intek ru ve tial tal bawk a, Kohhran dinglai an thahthlam tial tial a, tichuan June 19 & 20. 1811-a Bala khua-a an intawhkhawmna lianah chuan anmahni pualin Pastor tur mi 8 (Pariat) lai an nemnghet ta a. Hei hi Welsh Calvinistic Methodist Church Official taka a lo din takna chu a ni. Kalphungah leh Thurin ah John Calvin-a zirtirna an pawm a, inrelbawlna kawngah mumal leh duhtuina lamah chuan Methodist hruaitute zirtirna an chhawm bawk. Hun lokal zelah Calvinistic Methodist tih lai kha banin kum 1933 atangin Presbyterian Church of Wales tih hming an lo puta a ni.

            Wales Calvinistic Methodist Kohhran lo pian hun lai hi Sap rama Kristian te Chanchin Tha hrilh kawnga an thawh  nasat lai tak leh Mission pawl an din nasat vanglai tak a ni. Kum 1795 ah London Missionary Society din a ni a. Kum 1799 ah Church Missionary Society din a nil eh bawk a. Heng Missionary Society te kaltlang hian Wales Calvinistic Methodist Kohhran te pawh hian Missionary a tir chhuak ve thin a. Hun a lokal zel a, Pathian Thu kalpui danah leh Kohhran in enkawl danah duhdan a lo inan chiah loh bakah Wales Calvinistic Methodist Kohhran atanga Missionary tur an rawt te hnawl an lo ni fo bawk nen, anmahni ngeia Mission pawl neih an lo duh ve ta a. Tin, London Missionary Society kalphung pumpui mai chu English ho duhdan zuia kalpui a nih avang leh Wales ho chu English ho laka danglam an nih bawk si avang tein a hranpa a Chanchin Tha hril pawl (Mission Society) din chu thain an hre ta a ni. Tichuan, Dt. 11^th. January.1840 ah chuan Wales Mission Soceity an din. An hna hmasa chu thawhna tur hmun thlan a ni. Rawtna Pahnih Gujarat leh Khasi Hills awm zingah Khasi Hills chu an thlang ta ani.

(ii)   Wales missionary te Khasi rama an lokal thu leh presbyterian kohhran din tan thu: Wales Missionary hmasa ber Thomas Jones-a chuan Dt. 22^nd.June.1841 ah Khasi rama Cherrapunji a thleng a, hei hi tuna Presbyterian Church of India lo din tanna bul chu a ni. A Chanchin Tha hril chu a hlawhtling bawk a niang kum 1866 ah chuan Kohhran puitling 10 (Sawm) a ding a, hei bakah Branch Church engemaw zat a ding hman a ni. Kum 1867 ah chung Kohhran hrang hrang te chu Presbytery ah an inhlawm khawm a. Kum 1895 ah phei chuan Presbytery 5 (panga) lai a lo awm hmanin kum 1896 ah chung Presbytery 5 (Panga) te chu Assembly ah din a lo ni ta a ni.

            Khasi ram Missionary te chuan Khasi ram bakah an chhehvel phaizawl leh Manipur thlengin Chanchin Tha hrilh darhna tur an en zel a. Chutiangin kum 1891 ah chuan Rev. William Williams chu Mizoram en thli thlai tura tirh a ni a. Ani hian Mizoram leh Manipur te chu an Mission Field a pawm turin Board ah a thlen a, a rawtna angin Mizoram chu Field thar atan June 1892-a an General Assembly chuan a pawm ta a ni. Amah chu Missionary-a kal turin ruat a ni bawk a, nimahsela vanduaithlak takin Dt. 21^st.April.1892 ah a thi ta hlauh mai a, Missionary in a rawn chhuak ta lo a ni.

            Wales Mission-in Mizorama thawh a tum mek lai chuan Arthington Aborigines Mission tirhin Pu Buanga (J.H. Lorrain) leh Sap Upa (F.W. Savidge) te chu Mizoramah                                               Dt. 11^th.January.1894- ah an lo thleng a, an ni hi Mizoram-a Chanchin Tha mei det tute chu an ni ta a ni. Arthington-a hi mi hausa tak mai, Lal Isua a lokal leh ring hnai em em tu a ni a. Chuvangin a hnuaia Missionary te pawh Chanchin Tha chu hril thuai thuai a, kalsana hmun danga hril lehzel turin a duh a. Tawng pawh zir lova, tawng lettu hmanga hrilh zung zung turin a duh a ni. Chutiang chu a Policy a nih avangin Mizoram chu Welsh Calvinistic Mission hnenah a hlan ta thuai a ni.

            Helai chungchang sawi danah hian Arthington Aborigenes Mission chanchin ziaktu te leh kan Wales Mission chanchin ziaktute thu inhmu chiah lo lai a awm. Arthington’s Million tih ziaktu Chirgwin-a chuan, “Chutih lai chuan thil beidawnthlak a lo thleng phut a. Wales Calvinistic Mission te chuan Lushai Hills lamah ram zauh zel an duh a, Arthington-a ngaihdan chuan an thawhna hmuna midang an lo luh ve tawh chuan chung mithar te chu an tih tawk turah  ngaiin a hnuaia thawktu te chu Chanchin Tha la hrilh lohna ram thar lamah a tir mai thin. La thawh lohna ram tamtak a la awm laia midang nena thawhho pui atana rawtna chu a pawm theilo a ni.” tiin  a ziak. (A.M Chirgwin, Arthington’s Million… The Romans of the Arthington trust, London p-79) Heta a lan dan hi chuan Wales Mission te hi Arthington Mission Field-ah an va lut ve mai a ang viau. Pu Lloyd-a, kan zosap Missionary-in a sawi dan ve thung chuan, “Arthington-a chuan a hnuaia thawk te chu hmun danga sawn thuai thuai a duh avangin Wales Missionary te lo thlen hma pawhin Mizoram chu Wales Mission kutah hlan turin a Agent te thu a lo pe diam a ni.” tiin a sawi. (History of the Church in Mizoram P-32).

            Pu Lloyd-a sawi dan hi a dikzawk a rinawm viau. A chhan chu Chirgwin-a ngei hian           Pu Buanga te thian dun Mizorama kum thum ngawt mai an awm hi a lungawi lo hle a, a ngaihdan chuan hnam Pakhat Chanchin Tha hrilh nan Thla thum a tawk a, chuvangin Pu Buanga te thian dun pawh hi lo lawm a hnehin a lo hau zawk hial a ni a ti. Arthington-a duhdan hriat hian Pu Lloyd-a sawi dan hi a dik zawk duh hmel hle.

            Mizoram-a Wales Missionary lo thleng hmasa ber David Evan. Jones (Zosaphluia) chu         dt. 31^st.Aug.1897 ah Mizoram a lo thleng a, (tun thlengin Mizoramah Ramthar ni atan Kum 1973 atangin kan la hmang). Ama rual hian Khasi Tirhkoh Rai Bhajur-a te Nupa pawh an rawn telve nghal a, Mizo ten Missionary kan sawiin Sap te chauh kha Missionary-ah kan ngai deuh thin a, anmahni Sap hovin anmahni deuh chauh Missionary-a an inziah thin vang te pawh a ni ang e. Amaherawhchu, Rai Bhajur-a te pawh hi Missionary dik tak leh ngaihsan phu tak an ni. Amah hi a hun laia hna sang tak thawk a ni. Shillong-a High School Zirtirtu hna a thawh hnuah Sub-Inspector of School hna a vuan a. Chu hna ropui tak chu kalsanin rawngbawl turin a inpe ta a. An sawi dan phei chuan A pate-an chu thil a han hria chu mak a tiin pawi a ti em em a, a rilru a buai a nih ringin Bengali Doctor a ruai hial a ni. Rai Bhajur te hi Pu Zosapthara lo thlen hnu December 1898 hnu lawkah hmun danga thawk turin an haw leh ta a ni. Chanchin Tha rawngbawl hnaah a thawh hlawk hle a ni. He Missionary ropui tak chanchin hi Mizo te hian kan hlamchhiah mah mah maithei a ni.

            Chanchin Tha chu Khasi ram atanga intanin Mizoram-ah te, Kachar-ah te, Syhhlet-ah te, a lo darh zau zel a, Kohhran pawh a ding zel a. Kum 1923-a Shillong-a Assembly Inkhawmpui       (tuna Synod) chuan Assembly pathum-a then a rel a. Tichuan chung Assembly Pathum te inzawm khawmna Synod of Prebyterian Church in Assam chu dt. 27^th.-30^th.Aug.1926-ah din a lo ni ta a ni.  Kum 1953, Silchar-a Synod Inkhawmpui chuan Inkhawmpui hming a thlak leh a. Assembly tih thin chu Synod tih a ni a, Synod tih thin pawh chu Assembly a lo ti ta thung a ni.

            India ram a indan hnuin Assam State atangin State dang Meghalaya leh Mizoram Union Territory te an lo ding hrang a, Presbyterian Church in Assam tih hming put reng pawh chu a remchan zel tak loh avangin kum 1972 Assembly Inkhawmpui chuan a hming thlakin Presbyterian Church in North East India (PCNEI) a lo ti leh a, hei pawh hi kum 1992 ah thlak leh in Presbyterian Church of India (PCI) tih a lo ni leh ta zawk a ni. (Hei hi kan Synod Inkhawmpui agenda General 49-na of 1991 tih hlawhtlinna a ni).

II. PRESBYTERIAN KOHHRAN INAWP DAN KALPHUNG : Khawvela Kohhran hrang hrang te inrelbawl dan hi hlawm lian tak Pathumah a then theih, chungte chu :

(i)                      Prelacy : Kohhran hruaitu/hotu, Puithiam lal dan indawt chhawng neia mahni phak tawk china thuneihna nei theuh awmna kohhran e.g. Roman Catholic leh Anglican Kohhran ang te hi an ni. Kohhran inrelbawl danah Puithiam te lo chuan chanvo leh thuneihna an nei ve mang lo.

(ii)                   Congregationalist : Tualchhung kohhran tinte mahni-a ro inrel hranna, zawmpui leh thuneihna sang lehzual awm tawh lohna a ni. Tualchhung Kohhranin thuneihna tawp an nei.

(iii)           Prebyterianism : Rawngbawltu mimal thu ang nilo, Inkhawmpui indawt chhawnga Minister leh Upa ten ro an rel hona a ni. Presbyterian Kohhran ti Presbyterian tu ber pawh a inrel bawl dan hi a ni.

III. ROREL DAN KALPHUNG – A HUHOVA RORELNA : Presbyterian Kohhranah chuan thuneitu bik an awm lova, inrawn tlanga sawihona atangin thu an ti tlu thin. Hotu nei Kohhran-a hotu te duhdan nemngheh pui tura thukhawm ringawt ang an ni ve lo. Rorelnaah Member tinin zalen takin ngaihdan an sawi thiang vek a, vote thuhmun an nei vek a, Chairman chauhvin Vote a neilo a ni. Inkhawmpuina ah te tih loh chuan ban phar meuh a vote lak hi kan ti ngai meuh lo bawk. Hlutna inang tlang nei vek kan nih avang hian rorel member te mawhphurhna a sang em em a, inthlahdah chu pawi tak a ni. A hu hova rorelnaah hian tawng chak bik an awm hian a buaithlak duh deuh. Member thenkhat ten chhuanlam chhe te te siam a kalloh emaw ngaihdan sawi ve lova ngawih tlat te an ching duh. Fimkhur a ngai em em ani.

IV. RORELNA INDAWTCHHAWNG : Presbyterian Kohhran chu rorelna indawtchhawng (Church Court) hmanga ro in rel kan ni a, chung kohhran rorelna indawtchhawng te chu - Tualchhung Kohhran Committee, Bial Inkhawmpui, Prebytery Inkhawmpui, Synod Inkhawmpui leh Assembly inkhawmpui te an ni. (Khawmpui ti mai lovin Inkhawmpui tih hi an hmang hram hram thin). Heng te hi anmahni huam chhung theuhah chuan thu neihna nei an ni. Dan bu hmangin Kohhran rorelna chu kalpui a ni a, heng bakah hian Committee chi hrang hrang a awm leh a, Bial leh Presbytery ah chuan Standing Committee in Inkhawmpui inkara thu ngaihtuah tur tul awm te an rel thin. Synod ah chuan Synod Executive Committee a awm a, Assembly ah chuan Assembly Working Committee a awm bawk. Heng bakah hian rawngbawlna tichak turin Committee peng hrang tam tak a awm thei bawk.

            Church Court te hi anmahni huam chhung theuah chuan thu tawp neitu an ni a. An rorel pawh zawm ngei tur a ni. Thil tha tawk lo a awm a nih pawhin mahni thu a hnawl mai lovin rorelnaah bawk sawi that leh tur a ni. Kan Kohhran Inkhawmpui leh Committee thu te hi a zahawm a, a kengkawhtu te pawhin tih hlawhtlin ngei an tum thin. “Inkhawmpui thu chu Pathian thu a ni e, an lo ti thin reng a ni”. Pastor leh Upa ten Kohhran thurel te chu an kengkawh thin. Kohhran rorelna chu a hniam ber atanga a sang ber thlengin an zah a, an ngai pawimawh a, zawm an tum a, humhim pawh an tum tlat thin. Mimalin a duh ang taka rel a nih chiah loh pawhin rilru hnual deuh chung pawha kenkawh tlat an tum thin a ni. A hlawhtlin lohna turin an sawi chhe mai mai ngai lo. Chuvangin Pastor leh Upa te chuan tihhlawhtlin chu an mawh tih hriain Inkhawmpui rorel te chu ngun takin an vawng a, an zir thin a ni.

            Prebyterian Kohhran chuan Rolrelna felfai leh mumal nei turin uluk takin Pathian ropuinan an ti thin. Rorel dan mumal tak neih a duh avangin Dan Bu mumal tak a nei a, Dan pui bakah Dan te sep tam tak a nei bawk a. A chang chuan “Dan Kohhran” tih pawh min hlawhtir fo reng a ni. Hengte hi rorelna a mumal theihna tura tih a ni. Hei vang pawh hi a ni ang Presbyterian inrelbawl dan hi Kohhran inrelbawl dan tha ber pawla ngaih a ni. A bul tumtu ber John Calvin-a kha Pathian thu thiam a nih bakah dan hre mi a ni a, Kohhran inrelbawl dan a siam pawh hi fel takin Bible Zitirna mil thei ang berin a siam a ni. Krista ringtute hamthatna leh mawhphurhna dik tak tilang thei ang ber zawnga tih a ni. Rorelna chu holam leh namnul takin an ti mai mai ngai lo. Engkim uluk tak leh mawihnai takin an ti zawk thin. Chuvangchuan Presbyterian thu chhuak chu a muang deuh a, mi tinin Krista zara an chanvo tur dik tak an chan a, Krista tana mawhphurhna sang ber an hlen theihnana he Kohhran inrelbawlna hi siam a ni.

V. PATHIAN BIAK DAN KALPHUNG : Khawvela  Kohhran te Pathian biakdan hi hlawm hnih lian tak takah a then phawk theih a ni. (i) Liturgical leh (ii) Non-Liturgcal tiin.

(i)                Liturgical : Liturgical chu Pathian biak dan tur ruahman sa leh phuahsa hmanga a huhova Pathian biakna hi a ni. Heng Roman Catholic, Orthodox leh Kohhran hlun engemawzat hi chutianga Inkhawmnaa Pathian be thin hi an ni. Inkhawm dan tur ruahman sa fel tak a awm a, tawngtai dan tur pawh phuahsa a awm bawk.

(ii)             Non-Liturgical : Non-Liturgcal chu zalen taka a thlarau thawh ang zela Pathian biak hona kalpui a tih theih awm e. Inkhawm dan tur bi tuksa awm lova zalen taka Pathian biak hona a ni. 

            Mizoram Presbyterian Kohhran te hi chu a chunga kan sawi te inkara awm kan inti thei ang. Inkhawm dan tur leh tawngtai dan tur bithliah leh phuahsa zawma Inkhawm kan nilo. Inkhawm kaihhruaina bu siam ni mahse, a tul anga ti danglam turin rawngbawltuten zalenna an nei a ni.     Kum 1564 daih tawh khan Inkhawm hruaina, Book of Common Order chu siam a ni a. Mahse, Pathian thlarau-in a hruai ang zelin Pastor chuan a tidanglam thei tih a chuang. Kum 1952 atangin kan Kohhran bik pawhin kan hman tur Pathian Biak Inkhawm Hruaina Bu chu a lo ti chhuak tawh a, chu chu ennawn leh tihlen niin nikum 2010 khan a thar ber a tichhuak leh ta a. Thuhmahruai ah chuan “Tunlai khawvel danglam zelah hian pawl dang tihdan en a kal mai a awlsamin duh ulukna leh urhsunna lam kan hlamchhiah ang tih a hlau a, chuvangin uluk leh urhsun taka kalpui tur niin a hria a, zawm hram hram nise, Innehna leh Sakramen Inkhawmnaa hman tur tawngkam phuahsa te phei chu hman mai nise,” a ti hial a ni.

VI. INKHAWM CHI HRANG HRANG TE : Kan Kohhran hian Kohhran pum huap Inkhawm hi chawlhkar khatah vawi nga (5) kan nei. Chungte chu Pathianni chawhma Sunday School, Pathianni Chawhnu, Pathianni zan, Inrinni zan leh Nilaini zan Inkhawm te.  

            Pathianni Chawhma-a Sunday School kan neih thin hi Zosapte hunlai atanga kan neih tawh a ni. Pathian thu, Bible thu zirna atan leh thupui thlan bik zirna atan kan hmang deuh ber a ni.  Zirlai atana Bible chang tarlan te hi tantu in emaw, Superintendent in emaw chhiar thei hram se a tha. Tin, Sunday School hun hi zinglam mihring rilru fim lai leh harh that laia neih hi tha bera hriatna avangin hun tha ber Pathian thu zirnana kan hmang hi tihawm reng a ni a. Tin, Pathian thu zirna Kohhranin a ngaihpawimawh zia kan lantirna pawh a ni bawk. Mizoram Presbyterian Kohhran hi Nausen Baptisma chantir thin, Pathian ram changtute an ni ve tih kan hriat avangin naupangte Pathian thu a chawm chhunzawmna ah pawh a duhtui a, naupang Sunday School zirtirtu tur pawhin mi thiam, mi inpe leh duhawm kan enngun bik a ni.

            Pathianni Chawhnu Inkhawm hi tunhma chuan “Berampu Sermon Inkhawm” an lo ti thin. Kohhran chawmna lam thu Sermon sawina hun bika ngaih a ni.

            Pathianni zan Inkhawm hi “Missionary Sermon hun” an lo ti thin a, rawngbawlna lam hawi thuchah Kohhranin a beisei bik thin a ni.

            Inrinni zan Inkhawm hi Zosap ten Hapta karni min siamsak tirh atangin Tawngtai Inkhawma hman a ni reng thin. Kum 1954-a Nilai leh Beihrual thupui zirtur kan neih atangin rilru sawina atana Nilai zan Inkhawm-a hman thin chu Inrinni zanah sawn a ni bawk a, tunah chuan Sermon sawina atan pawh kan hmang ta a ni. Sermon tawi sawinana hman ni thei sela a duhawm ang.

            Nilaini zan Inkhawm hi hun hmasa lamah chuan Kohhran-a Dan zawhkim Inkhawm an ti thin a, Dan zawhkim te chauh an Inkhawm thin. Tin, Kohhran Committee rorel te chhiar chhuaka pawm rawtna a awm bawk chuan Dan zawhkim ten Ban pharin an pawmpui thin bawk. Chu chuan Presbyterian Kohhrana dan zawhkim te dinmun pawimawhzia a lantir awm e. Nilaini zan Inkhawm chu a tir ata tun thlengin Kohhran rorelna lam thil tihnan kan la hmang zui ta zel a, Dan zawhkim thar lawmluh, thunun leh thunun lakluh nan te, pem dawnsawn nan te, rawngbawlna report nan te hun hman a la ni ta zel a ni. Kum 1954 atanga Nilai leh Beihrual thupui zir tur buatsaih a nih atangin Thupui zirna hun atan kan hmang bawk.

VII. PATHIAN BIAKNA HMUN : Presbyterian Kohhran hmel lanna pawimawh tak chu Rorelna bakah Inkhawmna kan kalpui dan hi a ni. Biak In hman danah a fimkhurin a urhsun hle a, Thu rawngbawlna hmuna ding tur pawh a duhtui hle thin. Biak In hi boruak zahawm ruih hnuaia tihtakzeta Pathian Biakna tura ngaih a ni. Biak Inah PULPIT-in hmun langsar ber leh sangber a chang a, hei hian Pathian thu a ngaihpawimawh ber zia a entir a ni. Upa ho chu Pastor hovin PULPIT leh MAICHAM (Lalpa dawhkan) bul hnaiah an thu thin a, hei hian Lalpa Zanriah leh Kohhran ho chawmnaah Fatu chan chang nghal thei mai an nihzia leh chumi atana an inpeihzia a entir bawk.

            Tin, Pulpit leh Maicham humhalh leh hman dan pawh tha tak kan nei. Pulpita ding tur pawh a duh uluk thu kan sawi tawh a, mahni thusawi huna midang hun pek duh thu-ah pawh Kohhran hruaitute hnena thlen hmasak zel tur a ni. Pulpit hman dan turte, hman lohna turte siam a ni a, hman dan tur thu-ah hian point sawm lai tar chhuah a ni a, a then hi chu kan hriat sa tho te a nih avangin sawi nawn awm tlemte chauh han tarlang nawn ila. Pulpit hman theihna – Sunday School zirlai khaikhawmnan te, Nilai leh Beihrual thupui Sermon sawinan te, KTP leh Kohhran hmeichhe Inkhawm-a thusawi nan te, Inkhawmpui nikhua-a tantu leh Secretary te thu puan nan te a ni. Pulpit hman lohna tur point pasarih tarchhuah ah sawi nawn ngai bika ka hriat te - Solo, Recitation leh a huho deuhva zai nana hman loh, Inkhawm pangngaia Zaipawl hruainana hman loh, fianrial tawngtai nana hman loh, Camping nikhua-a Black Board tar nan te a hman loh tur a ni.

            Inpawlkhawmna hi Biak Inah tih loh theih hram a tha. Biakna chu Thanghlim leh Zahawm taka Pathian kan biakna a nih avangin fel tak leh zahawm taka hman tur a ni. Inpawl hona erawh chu Pathian bia-a Inpawl hona a ni chungin Inpawl hona-a tel te duhdan leh phur zawng tihlan kawngah a zalen deuh zawk. Tunlai hian harhna kan chan avangte, hlimna leh phurna kan zawn luat avang tein kan biakna urhsun pawh hi Inpawl hona (Fellowship) zia in a pawlh nasa ta hle in a hriat theih. Biak In chhung-a Inkhawm laia ring taka taka au rual te pawh hi Kohhran dang zia kan lakluh mek a ni. Zai paha kut beng kan nih loh chuan mite thiltih chawimawi leh fakna lantir a kut ben pawh Biak In chhungah tih ngai a ni lo. Biak In chhung bungrua te pawh hi Kohhran Committee remtihna lo chuan mahni thu-a hun sawn pawh tih loh tur a ni. Naupang lam Department te hi a hranga Chawhnu lamah pawh Sunday School Hall-a Inkhawmna neihpui an nih tak deuh vek avang hian Biak In-a an rawn Inkhawm tumah Biak In upna leh zahawmna an bosan tial tial a ang viau. Fimkhur a tul khawp mai. Biak In zah leh Biak na-a urhsun kawngah kan Prebyterian zia dik tak kan thar thawh leh hi a hun viau tawh awm e.

VIII. PRESBYTERIAN PATHIAN THU KALPUI DAN : Presbyterian Kohhran Thurin leh zirtirna te hi Bible-a innghat tlat a ni a, Bilbe thu te hi Pathian thu a nihzia uar taka zirtir zel chungin Bible tan chhanin Thurin te hi Tawngtaina nen uluk taka duan a ni. Ram danga Presbyterian leh Reform Kohhran te innghahna bulpui chu Westminster Confession of Faith hi a ni. Keini India ram Presbyterian Kohhran te chuan Welsh ram Kohhran thurin entawnin mawl deuh zawkin Thurin thlanchhuah sawm a nei a, hei hi rawngbawltute chuan an hrechiangin an pawm ngei tur a ni. Tunah Presbyterian Kohhran Pathian thu kalpui dana kan hmel tilang thei deuh thenkhat chauh han chhui zui ila :

(i)                 Bible chungchang :  Presbyterian Kohhran chuan Bible hi Pathian thu bu leh Pathian thawkkhuma pek a nih a pawm avangin Thurin leh Zirtirna laipui berah a pawm a. Kohhran thuneihna chunglamah a chawisang a. Thlarau thianghlim uapna leh hruaina hnuaia ziak a nih avangin hemi kalh zawngin thlarau hriattirna dik a awm thei lovang; chuvangin hei hi thil tih leh rinna tehna tur dik chu a ni. Bible kalh zawng inlarna emaw thlarau hriattirna emaw chu a tak a ni thei lovang. Thlarau thianghlim puihna avang chauhva hriatfiah theih a nih hi a pawm a ni.

(ii)                Pathian Lal chungnun berna :  Pathian Lalna leh Thuneihna uar taka zirtir hi Presbyterian Theology kungpui a ni. Roman Kohhran in thuneihna a pum hmawm a, Bible zirtirna aia Kohhran thu Lal zawk ni anga a kalpui avang khan Kohhran siamtha tute khan Pathian chu Lalber a nih thu an rawn sawi uar a. Hei hi Reform Kohhran te chuan vawiin thlengin thupui berah an la nei a ni. Pathian chu a nihphung hrim hrimah mihringte tawmpui ve phak loh ze ropui bik nei a ni. Engkim tithei, engkim hria, khawi kipa awm, chatuan mi, danglam ngailo a nihna te hi tuma tawmpui ve theih loh a ni. Engkima a ber hauhtu – Finna ah te, Thinghlimna ah te, Dikna ah te a ni fai vek a. Anihna tak tak pawh hi mihringin a hre phak tak tak lo, a hnathawh leh a thilsiam te a enkawl dan atangin a nihna thenkhat kan hre thei chauh a ni. A hnuaiah engkim a awm a, a enkawl a ni. Pathian Lalna leh Thuneihna hian Nunkawng leh thil tinreng a huap vek a ni. Chhandamna thu-ah pawh Pathian a Lal a, Chhandamna hnathawh ah mihringin a rel pui lo bawk. Chhandamna chan thu-ah pawh Pathian Thlarau thianghlim hnathawh a dah bulpui em em a ni. A thu thu in, a duh ang ang in a ti a ni.

(iii)              Trinity chungchang :  Pa leh Fapa leh Thlarau Thianghlimte hi Pathian pakhata minung pathum, lian bik leh te bik awm lo, pawimawh bik pawh awm lova intluk tlanga biak leh rin tur a ni. Presbyterian thurin atang chuan Pa leh Fapa kalhin Thlarau Thainghlimin hna a thawk lo. Bible-a Lal Isua duhzawng min kawhhmuh te dodal zawngin inlarna emaw Thlarau hriattirna dik emaw a awm theilo bawk.

(iv)              Mihring chungchang : Presbyterian Kohhran Thurin hian mihring hi a dah pawimawh hle a. Pathian anpuia siam anih ang takin felna leh thianghlimna ah te, chhia leh tha hriatna ah te, duhthlanna zalen leh ngaihtuah theihna neia duhawm taka din a ni. Suala a tluk hnuah sualin a fan chhuak vek a, mahse Pathian a anna a bo ta vek tihna chu a ni lo. Inngaihtuah theihna leh Pathian ngaihna chu amahah a la awm zui zel a ni. Amaherawh chu, tlu tawh mihring finna leh Pathian a ngaihna chuan Chhandamna a thlen zo chuang lo. Pathian khawngaihna tel lo chuan engtikawngmahin Chhandam a ni thei lo. Lal Isua hnathawh zarah Thlarau thianghlim tanpuina avanga tundin theih leh siamthar leh theih niin kan ngai a ni.

                        Mihring tlukna chuan Pathian leh Mihring inlaichinna bakah mihring leh mihring inlaichinna te, mihring leh khawvel inlaichinna leh Pathian leh khawvel inlaichinna chen in a tichhia. Chutiang a nih avangin Pathian Chhandamna pawh mihring Thlarau chhandamna mai ni lovin, Mihring nun pumpui leh thilsiam dang zawng zawng chhandamna keng telah kan ngai a. Chu chhandamna chuan heng zawng zawng hi             fan chhuak vek turin kan inzirtir thin a ni.

                        Presbyterian Kohhran ho hian mihring hnena Pathianin mawhphurhna a pek hi a sawi nep ngai lova, leilung pumpui enkawl hna hi min pe zawk a ni. Kan theihna pawh ama min pek a nih angin hman leh tihpun chu mihring mawhphurhna a ni. Ringtu nun kal zelah Pathan hmanrua ni tura nun pek chu a mawh a ni.

(v)               Ringtu zawng zawng Puithiam nihna : Kohhran siamthat hunlai leh a hma lamah te khan Puithiam ten rawngbawlna an pum hmawm a ni ber a. Miin Puithiam hmaah an sual an puangin anin a lo ngaidam thin. Mihring leh Mihring khatianga intih kha Kohhran siamtha tute khan tha an tilo hle a. Thuneihna hman sual tirtu tak a lo  ni si a. Martin Luthera chuan Ringtu zawng zawng Puithiam nihna a rawn sawi lar ta a. Isua Krista lo chu kan aia min sawisak turin kan mawmawh lova, kan sual kan sim pawhin mahni in Isua hmingin Pathian hnenah kan thlen mai thei a ni. Isua Krista chu kan tan Palai a ni si a. Kohhran mi tupawhin Pathian a rin duh leh a zui duh chuan ama kutah mawhphurhna a innghat thui em em a ni. Pathian rawngbawlna ah pawh nemngheh ni kher lo mahse, chanchin tha puandarhna kawngah te, chanchin tha humhim kawngah te mawh thui tak a phur a ni. Nguina leh chauhna in min hneh pawha mahnia Pathian hnena tlangnel tak leh ngampa taka tluk luh theihna Isua Krista zarah kan nei theuh a ni.

Ringtu zawng zawng Puithiamna hian a ken tel dang leh chu rawng in bawl sak tawn thei theuh tur kan nihna hi a ni. Mite tihsak leh tihharh nghak mai lovin midangte tihsaktu, rawngbawlsaktu nih theuh tum tur kan ni. Mikhual chawm leh tihharh nghaka thu kun mai lova, mahnia Pathian thu zira harhna chang thei tur khawpa Puithiam nihna kawl tir kan ni. Thuthlung hlui huna Puithiam ten, kawla nichhuak chhiara midangte tana inthawina an hlan ang khan nitin mahni leh midangte tana Thlarau lam Puithiam hna thawk thei tura Isua Krsta thisena silfai tawh kan nih hi.

(vi)              Sakramen chungchang :  Protestant Kohhran tam berte angin Presbyterian Kohhran hian Sakramen Pahnih – Baptisma leh Lalpa Zanriah kan nei.

                            Baptisma Sakramen :  Bible – ah  tanchhan fel tak neiin tuiin Baptisma kan chantir thin. Baptisma hi Thuthlung hlui thil serh pawimawh tak a ni. Levia chi Puithiam te chu tuia thehin Baptisma an chang thin a. Sinai tlangah mipui te chu thisena thehin Baptis an ni. (Num. 8:7,        Exo. 24:6-8) Bible-ah hian Thlarau thianghlim pek chhinchhiah nan tuia hnim aiin tuia leih emaw, theh emaw hi a lar zawk tlat. (Tirh. 2:33, 10:44-48, 11:15 & 16) Juda ten tui thianghlima insilfai an tih pawh kha intheh, inleih a ni thin. Hnim lam a hawi lo hle. (Exo. 30:18-21, Lev. 8:30, 14:7,    Num. 8:6-7) Hengte avang hian thlawra Baptisma kan chantir hi a tha tawk hle ah kan ngai a ni. Hetianga Baptisma kan chantir hian Isua Krista zarah Pathian mi kan ni tih Chhinchhiahna (Sign) leh Nemnghehna (Seal) a ni.

                        Juda ten Pathian nena a thuthlung chhinchhiahnan nausen serh hmawr vun an tan thin.    (Gen. 21 : 4) Hei hian Nausen te pawh thuthlungah an telve tih a entir a, tin, Isuan Naupangte a hnena hruai turin a zirtir a, Pathian Lal ramah an tel tih min hrilh. Sakramen zirte zawhna “Engvangin nge Nausen an Baptis ?” tih chhanna chu : (i) Puitling ang bawka Pathian chhandamna changtu an nih vang te, (ii) Thuthlung hluia naupang an tel angin Chanchintha ah pawh naupang te an tel avang leh (iii) Pathian khawngaihna leh chatuan nunna chang tlak an nih avangin, tih a ni. Krista ringa a taksa Kohhrana tel apiang te chu Baptisma an chang tur a ni, tih hi Presbyterian Kohhran te  pawm dan a ni e.

                        Kan kiang vela Kohhran dangte tihdan kan hmuh leh hriatte hian kan rilru pawh a hruai thui ta viau a ni maithei. Dan chhunga lut turte Chhandamna chang lo (Piangthar lo) ang hrima Gospel Camping kan neihpui fo ta mai te hi a Presbyterian kalphung lo viau zawk a ni. Chungkua-a Pathian thu kan inzirtir danin a zirloh vang emaw, kan inthlahdahna avang emaw a ni zawk maithei e. Kan fate chhandamna thu-ah kan ngaih a ngam lo tlat a, kan kalphung kan bawhpelh ve deuh a ni maithei a ni.

                        Lalpa Zanriah Sakramen :  Kan Kohhran Sakramen pawimawh tak dang leh chu Lalpa Zanriah Sakramen hi a ni. Krista thihna hriatreng nana chhang leh Uaiin chan ho hi a ni a. Ringtuten Krista thihna-a hlawkna an chan  chhinchhiahna leh nemnghehna a ni. Chhang leh Uaiin te chu Krista taksa leh thisen entirna, a thihna leh thawhlehna tawmpuina atan kan hmang a, Krista ngei chu thlarauva kan zinga a lo tel avangin ringtuten rinna nena kan chan chuan nasa takin Pathianin malsawmna in min vur thei tih kan ring a ni. Minung Lalpa leh a Kohhran, amah ringtute inzawmna tih tharna tur leh tih nghehna, thlarauva Pathian leh ami te inpawlna leh a tana rinawm taka thawk tura kan inhlanna te a nih avangin Kohhranin a ngai pawimawh em em a. Dan zawhkim thar lawmluhna inkhawmah pawh a mal mal in he zawhna hi – “Thlarau lam thatna dawnna kawng pawimawh – Sakramen te…. I ngaipawimawh em?” tih hi kan zawt vek a, “ngaipawimawh e” tiin kan chhang vek bawk a ni. Nimahsela tunlai hunah hian kan Sakramen te hian ngaihhlut a hlawh lo tial tial in Sakramen neih tumah Inkhawm lo pawh kan tam tial tial a ang hle. Pastor Bial fan tuma Sakramen neih turah pawh Naupang Sunday School chawhnu Inkhawm pawh kan cancel mang loh tum a tam ta hle mai. (Naupang Sunday School zirtirtu tam tak te hi KTP hruaitu leh Member te an ni si a.) Kan Sakramen pawimawh tak “Krista malsawmna” kan channa hi kan hlut tawk em le ? tih hi inzawt theuh ang u. PCI dan bu chuan Kohhran tinin kum khat chhungin Lalpa Zanriah Sakramen vawi thum (3) tal neih an tum hram tur a ni, a ti nghe nghe a ni.

(vii)           Hun hnuhnung thu : Hun hnuhnung thu hi Mizo te hian kan buaipui nasa  khawp mai a, a bikin kohhran chhuahsan tu tam tak te hian hun hnuhnung thurin hi an buaipui zual emaw ni tih tur a ni. Hun hnuhnung thu hi hlawm hnih in a sawi theih awm e.

a)      Mimal Hun hnunhnung thu : Mi a thih veleh hian engtinnge a awm tak tih hi kan thurin hian a sawi lova, nimahsela kan Kohhran thurin lakna hnar Westminster Confession leh Catachism lamah erawh chiang takin a lang thung. Hetiangin – “Thih hnuin Mihring taksa chu Vaivutah kirin a tawih ral a. (Gen. 3:19, Tirh. 13:36) Mahse, a thlarau thi lo leh muhil lo, thihtheihlohna nei chu a petu Pathian hnenah a kir nghal a ni. (Luka 23:43, Thupuan 12:7) Mifel te thlarau chu thianghlimna-a tih famkima awmin vanah khian lawmluhin a awm a, chutah chuan eng leh ropuiah Pathian hmel hmuin an taksa tlanna famkim hun an nghak a ni. (Heb.12:23, IIKor. 5:1, 6, 8, Phil. 1:23,           Tirh. 3:21, Eph. 4:10) Misual te thlarau erawh chu hremhmunah paihin an awm a, chu hmun thim  leh tuarna hmunah chuan Rorelna ni ropui atan khekin an awm a ni.        (Luk. 16:23-25, Tirh. 1:25, Juda 6,7. IPet. 3:19) Heng hmun hnih lo hi chu Pathian lehkha thuin taksa thih hnu thlarau kalchhuak te awmna hmun tur dang a sawi lo. Ringtu chu a thihin a tharau thianghlimna-a tihfamkim a ni a. Ropuina-ah a lut nghal a ni. An taksa chu Krista nena inzawm reng chungin thawhlehna hun hma chuan an lo chawl a ni. (Catachism. No.37)

A chunga kan tarlan atanga lang ta chu ringtu a lo thihin a thlarau chu van ramah a kal nghal a , Pathian ropuina changing ni hnuhnunga Krista lokal leh huna taksa thawhleh na chu an lo nghak a ni.

b)      Lal Isua lokal lehna hun hnuhnung :  Lal Isua lokal lehna hun hi ringtute beisei famkimna tur a nih avangin Presbyterian Kohhran chuan a ngaipawimawh em em a ni. “Hun tawpah Lal Isua a lokal leh anga, rorelna hnunhnungin a zui ang” tih hi kan Kohhran rindan a ni. Hun tawp leh Lal Isua lokal leh inkara kum sang tla tur leh rorel lawkna awm turah a ngai lo. Chumi awmzia chu mihring kum bi chhiar anga kum sang rorel hi dan naran in a ringlo a ni. Thurin ziaktute chuan miin kum sang rorel thu hi a Kristianna kawng a chak phah nan leh hlawk phah nana a hman chuan pawi kan tihsak lo a, miin a rin duh loh pawhin pawi kan ti lem lo an ti a ni.

Hun bi te hi Pathian ruat a nih avangin hun tawp lo tlen hun tur hi chhut dik theihah kan ngai lo bawk. Hun tawp chhut nana Daniela Hapta hman leh Sakawlh hlauh viau te hi tul kan ti lem lo. Kohhran hi Krista taksa a nih avangin sawichhe tu leh tiduhdah tu awm thin mahse, a lokal hunah hnehna min chantirin chatuan ropuina min pek dawn avangin hun hnuhnung thurin hi nghet takin kan vuan a ni.

VIII. PRESBYTERIAN HMATHLIR : Socialist hmingthang tak Max Weber-a chuan ram hmasawnna leh sakhaw inzirtirna inlaichin dan uluk taka a zirna atangin he ti hian a ziak a. “Kristian ram te hi Kristian lo ram te ai chuan an changkang zawk a, Kristian ram rau rau ah pawh Protestant ram te an changkang bik a, Protestant ramah pawh Calvin-a zuitu Prebyterian ramte an changkang zual a ni” a ti. Hei hi a chhan chu Presbyterian Pathian thu kalpui dan hian changkanna a keng tel tlat atin a ni e. Presbyterian inzirtirna chuan ram hmasawnna leh intodelhna a hawi hle a ni.

            Presbyterian te chuan hnathawh hi rawngbawlna a nihzia kan inzirtir thin a, Mhring te chu Pathian ropuina tura hna thawk tur kan nihzia leh he leiah ngei pawh hian Pathian ram din tura thawk tur kan nih kan inzirtir thin a ni. Leilunga Pathianin hausakna a  dahte dap chhuak a, Pathian ropuinana hmang turin kan inzirtir a ni. Presbyterian Kohhran chuan mihring theihna Pathian pek a ropuina atana hman leh tihpun tur ni a  kan zirtir avangin zirna hmanga thiamna hi a uar hle bawk. John Calvin-a khan Europe ram puma hmingthang tham zirna Geneva ah a din a ni. Tin, India rama Presbyterian Missionary, Alexander Duff pawh kha “Tunlai India zirna Pa” tia hriat a ni  bawk. Tin, Mizorama kan Missionary Zosap te pawh kha zirna lama hma hruaitu pawimawh tak an ni bawk.

            John Calvin-a kha dan leh Politics zir a ni bawk a, Politcs chungchang a zirtir nasa in a zirtirna zuitu Kohhran te pawhin ram rorelna hi an ngaipawimawh zui zel a ni. Ani ngaihdan chuan Sawrkar hi mihring awmkhawm siam mai a ni lo. Ram leh hnam leh thilsiam dangte enkawl tura roreltu ni tura Pathian ruat an ni a ti. Rorelna zawng zawng hi Pathian Lalna hnuai ami a ni a ti bawk. Calvin-a zrtirna zuitute chu ram siamna kawngah ke an pen nasa hle thin. England rama Democracy sorkar a din khan a bul tumtu chu Presbyterian hote an ni a, British laka America a indan leh an ram danpui rel velah pawh Presbyterian ho chu a phusa berte an ni. Netherland ram Holly Roman Empire laka a indan naah te, Scotland ram indan naah te a phusa berte chu Calvin-a zuitu te vek an ni bawk. Kan ramah pawh hian a tir atanga vawiin ni thlengin Kohhran ten an thawh hlawk hle reng a ni.

TLANGKAWMNA :  Kan Paper zir atana kan thupui Presbyterian Kohhran kalphung  hi tam tak sawi tur a la awm a, a sei thuah inthlahrun a na a, famkim lo tak chuan kan han titawp ta dawn a ni. Kan zirtak atang te khan zir thar tur a awm ngei ang tih ka ring. Insiam  tha zel leh hmasawn zel turin I inbuatsaih zel ang u.

---------------------- KA LAWM E. ---------------------

SAWI HO TUR :

1. Presbyterian Kohhran kalphung kan han sawi baka kan ngaihpawimawh te sawi khawm ila, kan Presbytery huam chhungah sawi uar kan duh lai te pawh sawi ho bawk nise.
2. Presbyterian Kohhran kalphung leh Thurin te hi Kohhran pawl dangte aiin kan Mipuite hi an chiang lo zawka sawi thin a ni a, hei hi  dik kan ti em? Dik ni ta sela engtia tan lak tur nge ni ang?
3. Kohhran Inkhawm hi a tam kan ti em? Nge a la tha rih kan ti zawk.
4. Lalpa Zanriah Sakramen Inkhawm hi engtinnge kan ngaihpawimawh lehzual thei ang.?
5. Khawtlang siamthatna lam hi engtinge kan uar zel thei ang?